Tolosaldeko turismo bulegoa Itourbask, Turismo Bulegoen Euskal Sareko kidea da. Eusko Jaurlaritzako Turismo Zuzendaritzak koordinatzen duen sare honek, urtero, Famtrip edo familiarizazio bidai bat antolatzen du Euskadiko eskualde batetara.
Hain zuzen, turismo bulegoetako informatzaileak formatzeko helburua du txango horrek, beren jatorrizko herri edo eskualdeaz gain, Euskadiko beste helmugen inguruko informazioa emateko ere gai izan daitezen. Eta, noski, lehen eskutik ezagutzen den horri buruz, hobeto informatzen da.
Famtrip-ak edo familiarizazio bidaiak artatzea, Tolosaldea Garatzeneko Turismo Sailaren Marketin eta Merkaturatze lan ildoetako bat da. Euskadiko beste erakundeekin elkarlanean bidai agentziak artatu ohi dira, beraien eskaintzetan Tolosaldeko turismo baliabide eta enpresak ere sar ditzaten.
Zehazki, 39 pertsonako taldea izan zen bisitan, eta Tolosaldeko turismo bulegoan ez ezik, Topic museoan, Bide-bide hotelean eta jatetxean, Rafa Gorrotxategiren Txokolatearen Museoan, Altzoko Handia erakusketan, Txindokiko Itzala informazio puntuan eta abentura parkean, San Bartolome elizan eta Pello Zabala gunean ere egon ziren. Altzoko Ostatuan bazkaldu zuten.
Euskadiko 30 turismo bulegoetako langileek osatu zuten taldea: 4 Arabatik, 12 Bizkaitik eta 14 Gipuzkoako beste eskualdeetako bulegoetatik. Tolosatik hasi dute txangoa, eta Altzo, Abaltzisketa eta Amezketa ere ezagutzeko aukera izan dute.
Argazkiak: Mikel Iraola (Tolosaldea Garatzen).