Ostegunean, 140 kilometroko proba jokatu zuten elite eta 23 urtez azpiko txirrindulariek, Altsasun (Nafarroa). Lehendakari Txapelketarako puntuagarria zen proba, eta eskualdeko txirrindulariak izan ziren tartean. Laboral Kutxa taldeko Iñaki Murua altzotarra eguneko ihesaldian egon zen, eta onena izan zen mendiko sailkapenean. Sailkapen orokorrean, 31. izan zen.
Emaitza hobea lortu zuen Baque Team taldeko Gorka Sorarrain tolosarrak; hirugarren izan zen helmugan. Azken kilometroetan, tropeleko txirrindulari indartsuenak elkarrekin zeudela, ihes egiten saiatu zen, baina ez zuen nahikoa abantaila lortu. Amaierako metroetan, berak bideratu zuen esprinta, baina borobiltzea falta izan zitzaion, eta azkenean, hirugarren helmugaratu zen. Yanne Dorenbos eta Xabier Berasategi sailkatu ziren lehen eta bigarren postuetan, hurrenez hurren.
Larunbatean jokatu zuten Oñatin Lehendakari Torneoko azken proba. Txapelketako sailkapen nagusian, Sorarrain izan da eskualdeko txirrindulari onena, hamalaugarren postuan amaitu baitu. Iñaki Diaz (Caja Rural-Alea) tolosarrak 29. postuan amaitu du, eta Muruak, 48. postuan. Diazen taldekide den Mulu Kinfe HaileMichael etiopiarrak irabazi du txapelketa, 156 puntu bildu ondoren. Bigarren sailkatua eta 23 urtez azpiko lehen sailkatua Xabier Berasategi (Laboral Kutxa) izan da, eta Ander Ganzabal (Eiser-Hirumet) izan da hirugarren.