Tolosaldea edo Deustu. Bietako batek lortuko du datorren urterako Euskotren Ligarako zortzigarren txartela. Asteburu honetan ari dira jokatzen kanporaketa. Gaur Bermeon aritu dira arraunean, eta eskualdeko trainerua aise nagusitu da. Ziabogan sei segundokoa izan da tartea Tolosaldearen alde. Helmugan, baina, tarte hori ia hirukoiztu egin dute eskualdeko arraunlariek. Azkenean, Tolosaldeak 11.27,24ko denbora markatu du, eta Deustuk, 11.44,08koa.
Estropada amaitutakoan, Maialen Amondarain patroiak hitz egin du ETB-ko mikrofonoetan: "Lasaitu ederra hartu dugu. Segundo hauek oso ondo datozkigu biharko. Abantaila ona dugu eta bihar aprobetxatzera irtengo gara. Hori bai, zerotik hasiko dugu estropada, arraunean ahalik eta ondoen egiteko".
Bihar Portugaleten izango dira arraunlariak, eta Tolosaldeak alde nabarmenarekin egingo dio aurre kanporaketako bigarren estropadari.