Udako txapelketarik luzeenaren finalerdiak erabakita geratu ziren asteburu honetan. Eskualdeko bi ordezkari zeuden play off-etan, eta biek lortu dute aurrera egitea.
Erik Jakak eta Zabaletak euren partida galdu egin zuten, 22-17 Irribarria-Albisuren aurka. Hala eta guztiz ere, galtzaileen artean tantu kopurua begiratuta, aurrera egitea lortu dute. Urrutikoetxea-Rezusta izan ziren beste play off-eko galtzaileak. Jokin Altunak eta Ander Imazek 22-7 irabazi zien txapelketatik kanpo geratu diren bikoteari. Amezketarrak erakustaldia eskaini zuen partida horretan, lesiotik osatuta dagoela erakutsiz.
Finalerdiak eta finala
Irailaren 30ean jokatuko dira bi finalerdiak Iruñeko Nafarroa Arena pilotalekuan. Jakak eta Zabaletak ligaxkako lehen sailkatuen aurka jokatuko dute: Ezkurdia-Mariezkurrena II.a. Altuna III.aren eta Imazen aurkariak Irribarria eta Albisu izango dira. Finala bi egun beranduago jokatuko dute leku berean partida horietako irabazleek.