Asteburuan, Pistako Espainiako Txapelketak jokatu dituzte Valentzian. Bertan izan dira Eukene Larrarte eta Naia Amondarain eskualdeko txirrindulariak. Tolosarrak Bizkaia Durango taldearekin hartu du parte, elite mailan; ibartarrak, berriz, Sopela Women's Team taldearekin aritu da, 23 urtez azpikoen mailan.
Lau probatan hartu dute parte Larrartek eta Amondarainek. Tolosarrak kanporaketa proban lortu du emaitzarik onena, urrezko domina alegia. Gainerakoan, laugarren izan zen jazarpenean, hamargarren scratch proban eta hamahirugarren puntuazioan.
Hain justu, proba horretan gailendu zen Amondarain. Ibartarrak 44 punturekin amaitu zuen 100 itzuliko lasterketa, eta urrezko domina eskuratu zuen. Bigarren sailkatuak 34 puntu lortu zituen. Gainerakoan, jazarpenean bosgarren izan zen Larrarteren atzetik, Scratch proban hamabigarren eta kanporaketan hamalaugarren.
Amondarain, Frantziara
Naia Amondarainek ez du atseden hartzeko tarte handirik izango. Bihartik astelehenera bitarte, Tour Cycliste Féminin International de l'Ardèche lasterketan parte hartuko du, Sopela Women´s Team taldearekin.