Tolosaldea IKT taldeko Nahia Garrido Malvar igerilaria infantil mailako Europako FOJE (Festival Olímpico de la Juventud Europea) txapelketan ari da parte hartzen. 100 metroko bizkar igeriketa proban lehenengo tokian sailkatzea lortu du 1'02''28 denbora eginez, eta honenbestez, Euskadiko errekorra ezarri du kategoria horretan. Bigarren urrezko domina jantzi du eskualdeko igerilariak 200 metro bizkar estiloan ere irabazi baitzuen urrezko domina asteartean.
Bide batez, Garridok 4x100 metroko proban ere parte hartu du, erreleboka. Tximeleta estiloan aritu da IKTko igerilaria eta Espainiako taldeak zilarra lortu du proba horretan.
Jaialdi Olinpikoan selekzioka jarduten dute gazteek kirol ezberdinetan. Espainiakoak euren selekzioan parte hartu duten kirolarien artean onena izendatu du eta gaurko itxiera ekitaldian bandera eramango du Garridok.
Europako onenak
Europako Gaztediaren Jaialdi Olinpikoa Eslovakiako Banska Bystrica hirian egiten ari dira. 14 eta 18 urte arteko Europako kirolari onenak parte hartzen ari dira. Espainiako Igeriketa Federazioak 16 igerilari deitu ditu eta euskal herritar bakarra Tolosaldea IKT taldeko igerilaria.
Europako Gaztediaren Jaialdi Olinpikoa 1990ean sortu zen, Europako Batzorde Olinpikoen Elkarteen eskutik. Europako kirolari gazteei zuzendutako ekitaldi nagusia da. Bi urtean behin egiten da, neguan eta udan.