Eta festarekin bueltatuko da trikiti doinuak burutik kendu nahi eta ezina. Bueltatuko da txosnetako goizaldeko usaina eta txosna ireki berritan itsatsiko zaizkigu besoak barraren gainean. Bueltatuko da ajearekin familiako bazkarira joateko iratzargailua jotzen duen unea. Bueltatuko da bueltatxo bat egiteko asmoarekin atera eta goizeko eguzki izpiek begietan min emango diguten momentua. Eta ze kristo, buelta daitezela horiek guztiak. Behar genituen eta behar ditugu.
Itzulera denona dela abestu dute Pello Reparazek eta Erramun Martikorenak orain gutxi. Itzulera denona den moduan festa ere denona delako. Bueltan nahi ez ditugunak, ordea, erasoak dira, erasotzaileak, hobe esanda. Dena, ia dena etenda egon den bitartean hauek jarraitu egin dute. Eta jakin badakite gurean ez dutela lekurik, ez direla ongi etorriak festara. Ez daitezela bueltatu, arren.
«Bueltan nahi ez ditugunak, ordea, erasoak dira, erasotzaileak, hobe esanda. Jakin badakite gurean ez dutela lekurik, ez direla ongi etorriak festara»
Poza behar genuen, umore onez ibiltzea, elkarrekin egotea, besarkatzea, zaintzea. Horiek denak bueltatu dira, bueltarazi ditugu, eta jarraituko dugu horretan, ondo ikasitakoa ez delako inoiz ahazten. Edo bada bi urte hauetan arin-arina eta fandangoa nola dantzatzen den ahaztu zaionik? Bada norbait festa gustatzen ez zaionik? Beti izango dugu jaietan lekua edo saiatuko gara hor egoten behintzat, gure alea jartzen.