Ezohiko tenperatura dago azken egunotan Euskal herrian, eta gaur ere beroa goizean goizetik nabari da eskualdean bezala, denean.
Gaueko tenperatura baxuenak, esaterako, Lizartzako Araxesen dagoen estazioan neurtu ditu Euskalmetek. 16,2 gradu markatu ditu, 06:50ean. Antzekoa neurtu dute Berastegin, 16,5 03:20ean; Belauntzan, 17,5 06:40ean, eta Alegian 18,4, 06:50ean. Tolosaldean dauden gainerako estazioetan, hau da, Bidania-Goiazkoan eta Zizurkilgoan 20 gradutik gorako baxuenak izan dituzte. Bidaniaren kasuan, 24,1ekoa izan da baxuena, 02:10ean, eta Zizurkilen, 21,9, 03:40 zirenean.
Hortik aurrera, tenperatura igoz joan da, ezohiko balioetara iritsiz. 30 graduak, esaterako, 09:20etarako gainditu dituzte Berastegin, Zizurkilen, 10:00etarako, Alegian eta Belauntzan 11:00etan, Lizartzan 11:30ean, eta Bidanian, 12:20ean.
Tenperatura gorenak, berriz, Alegian erregistratu dituzte, 42,1 gradu, hain zuzen, 16:50ean. Zizurkilen, berriz, 41,5raino igo da 17:00etan, eta Belauntzan 41,3raino 16:30ean. 40 graduak Lizartzan ere gainditu dituzte; 40,9 gradura iritsi dira Araxesen 16:10ean.
Berastegin ere 40 graduetatik gertu ibili dira. 39,6 gradu markatu ditu termometroak 17:30ean. Bidanian, berriz, 36,3 izan da erregistratu duten altuena, 17:50ean.