Urtanta ekimena egingo dute Pasaiatik Azkainera

Euskal Herriko kultura eta ondarea sustatu eta zabaltzeko, bi urtez behin Urmuga ekimena antolatzen du izen bereko elkarteak. Aurten, helburu berbera izango duen hiru eguneko Urtanta ekimena antolatu dute eta kultur elkarteko kide eta antolatzaile den Migel Zeberio tolosarrak azaldu du, zeharkaldia «txikia baina ederra» izango dela.

Pasai San Pedron uztailaren 22an hasi eta Azkainen bukatuko dute ekimen ibiltaria uztailaren 24an. «Gipuzkoa, Lapurdi eta Nafarroa mendiz eta itsasoz lotuko ditugu», esan du Zeberiok. Horretarako Urmuga kultur elkarteak Elkano Itsas Herria ekimena izango du bidelagun. 500 urte dira Elkanok munduari itzulia eman ziola eta urtemugaren harira Albaolan osatu duten Pataxa erreplikak itsasoz lotuko ditu Pasaia eta Azkaine.

ITSASOA, MENDIA ETA MUSIKA

Egunez egun, ontzia lehorreratzen den unea baliatuko dute Urmugakoek musika emanaldiak eskaintzeko. Lehen egunean, uztailaren 22an, Artzuportun egingo du geldialdia Pataxak eta 18:00etatik aurrera Erentzingo itsaslabarrean, Bioznar lurmutur parean, kantu herrikoi saioa egingo dute. Leire Berasaluze Letu, Kristina Aranzabe eta Urtanta bandarekin batera ariko dira, besteak beste, Bixente Martinez, Igor Telletxea, Gorka Benitez, Iñigo Telletxea eta Leturia.

Bigarren eguna Hondarribian emango dute mendizaleek eta bertako Kai Zaharrean egingo du lurreratzea Pataxa ontziak. Arratsaldean, berriz, Et Incarnatus Orkestrak emanaldia eskainiko du Kasino Zaharrean, eta besteak beste, Petti, Xabi Solano, Xabier Berasaluze Leturia, Estitxu Pinatxo eta Miren Narbaiza ariko dira emanaldian. Uztailaren 23ko 22:00etatik aurrera, Hondarribiko Musika Bandak kontzertua eskainiko du Santiago kalean.

Azkeneko eguna Azkainen emango dute Urtanta ekimeneko parte hartzaileek. Horretarako mendizaleak 08:00etan aterako dira Hondarribitik eta zazpi bat orduko ibilaldia eginda iritsiko dira Azkainera. Bidean, Larhungo gainean, 11:00etan, aperitifa emango dute eta Donostiako Orfeoia ariko da Et Incarnatus Orkestrarekin. Eguerdirako espero dute Azkaingo portuan Pataxa ontzia eta bertan musika, taloak eta Mundu Bira erakusketaren irekiera izango dira. Donostiako Orfeoiak eta Et Incarnatus Orkestrak elkarrekin emanladia eskainiko dute 18:30ean Termin izeneko eremuan eta egunari errematea Murgi taldeak emango dio Azkaingo plazan.

Goi mendietatik Euskal Herriko kostara eramango dute aurtengoan Urmuga. Itsasoa, mendiak eta musika izango dira protagonista eta ekimenean parte hartu nahi dutenek informazio guztia izango dute www.urmara.eus helbidean eta info@urmuga.eus posta elektronikoan. «Urmugak aurten ur tanta bat isuriko du, nora eta Kantauri itsasora», esan du Zeberiok. Ekimenean bultzatzaile gisa ariko diren erakundeei esker ona adierazi eta zeharkaldian parte hartzeko gonbita luzatu die herritarrei.