Atzo hasi ziren Uemak antolatzen dituen Salto! udalekuak. Udalerri euskaldunetako 15 eta 18 urte arteko 100 bat gazte ari dira parte hartzen eta bi zutabetan abiatu zuten egonaldia; Etxarri Aranaztik eta Tolosatik. Gazteak euskararen inguruan sentsibilizatzea, kontzientziatzea eta eragile aktibo bihurtzea da ekimenaren helburua, eta horretarako egitarau oparoa antolatu du Uemak, udalekin eta hezitzaile taldearekin batera.
Atzo Tolosatik abiatutako zutabeari udalak eta Galtzaundi Euskara Taldeak egin zioten ongietorria Tolosan eta bisita gidatua egin zuten herrian zehar. Etxarri Aranazkoei ere udalak eta euskara batzordeak egin zien harrera.
Tolosaldean bihar arte egongo dira. Tolosa eta Alkiza artean eman zuten atzoko eguna, gaur Leaburu-Txaraman daude; eguerdian, suziria jaurtiz egin diete harrera Leaburuko plazan udal ordezkariek eta arratsaldea eta gaua bertan pasatuko dituzte. Bihar, Berastegira iritsiko dira.
Salto! udalekuak Uemaren ekimena diren arren, beste zenbait erakunde publikoren lankidetza eta laguntza izaten du. Eusko Jaurlaritzak diruz lagundu du topaketa, beste behin ere. Miren Dobaran Eusko Jaurlaritzako Hizkuntza Politikarako sailburuordearen hitzetan «udalerri euskaldunek eta euskararen arnasguneek normalizazio prozesuan berebiziko garrantzia dute, eta baita udalerri hauek zaintzeko berariazko hizkuntza politikek ere. Ildo horretan Uemak egiten duen lana eta soziolinguistika edukiak gazteen artean zabaltzea giltzarria da».
Goizane Arana Uemako teknikariak eta udalekuen arduradunak esan du ezagutzaren eta erabileraren arteko koska leuntzeko, ezinbestekoa dela kontzientziazioa. «Argi ikusten dute hori guztiek eta, beraz, baita topaketa hauek antolatzeko behar dugun laguntza eskaini ere».