Itxaso Erasunek ezin izan du txapela jantzi

Pilotari zizurkildarrak Miren Larrarterekin jokatu behar zuen Nafarroako Foru Komunitatea Txapelketaren finala, baina azken honek eskuko minarekin ezin izan du jokatu.

Itxaso Erasunek, beraz, Maddi Barrokal izan zuen aurrelari eta 22-16 galdu zuten Amaia Aldai eta Nora Mendizabalen aurka, pilota mistoarekin. Aurreko koadroetan borroka handia izan zuen partidak. Azkenenerako, ordea, Amaia Aldai nagusitu zen, Dimako pilotariak tantoak amaitzeko orduan eskarmentu eta erabakitasun handiagoa erakutsi baitzuen. Nafarroa Arenan jokatu zen finala, eta 1.600 pilotazale izan ziren bertan, eta antolatzaileek nabarmendu dutenez, "emakumezkoen pilotak pauso handiak ematen jarraitzen du oraindik egiteko duen bide luzean, eta gaur bere sabaietako bat hautsi du berriro".

Finaleko jaialdian, hirugarren eta laugarren postuak ere bazeuden jokoan, eta oraingoan garaipena eskualdera etorri zen. Irati Zabala atzelari lizartzarrak, Madalen Etxegarairekin batera 18-4 irabazi zieten Leyre Oskoz eta Uxue Oses bikoari.

Gazteen lau  eta erdiko finalean, Leitzako Goiuri Zabaletak txapela etxean geratzea lortu zuen, finalean Leire Galeano gipuzkoarra 18-10 mendean hartuta.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!