Nafarroa Arenak hartuko ditu Nafarroako Foru Komunitateko Torneoaren finalak, igandean 12:00etatik aurrera hasiko den jaialdian. Lehenengo partidan lau eta erdiko finala jokatuko da, pilota mistoarekin eta gazteen mailan, Goiuri Zabaleta eta Leire Galeanoren artean. Ondoren, binakako txapelketaren 3. eta 4. postuak erabakiko dituen partida jokatuko da, eta hor eskualdeko ordezkaritza ere izango dugu, Iratzi Zabala lizartzarrak jokatuko baitu. Zabalak Olatz Arrizabalaga aurrelariarekin ariko da, eta aurkari Maddi Barrokal eta Uxue Oses izango ditu. Ondoren, binakako finala jokatuko da, Aldai-Mendizabal eta Larrarte-Erasun bikoteen artean.
Sei finalistekin prentsa agerraldia egin dute aste honetan, eta Emakume Master Cupeko antolatzaileek azaldu dutenez, Nafarroa Arenak emakumezkoen esku pilota onenaren erreferente ere izan nahi du Nafarroako Foru Komunitateko Torneoren bigarren edizioaren finalekin. "Dagoeneko inolako murrizketarik gabe, igandekoak txapelketa arrakastatsu baten ginga izan behar du, izan ere, azken asteetan Nafarroan zehar jokatutako jaialdiek txapelketa erreferente bat sortzeko eta emakumezkoen kirola, kasu honetan esku pilota, ikusarazteko helburu nagusiak bete dituzte", azaldu dute antolatzaileek.
Finalen aurkezpenean Juan Martinez de Irujo pilotari ohia izan zen, eta baita Begoña Echeverria (Nafarroako Kirol Institutuko zerbitzu zuzendaria), Maite Bueno (Laboral Kutxako eskualdeko zuzendaria), Javier Conde (Nafarroako Pilota Federazioko presidentea) eta Ainhoa Ugarte, txapelketako eta finaleko lehen epaile nafarra, "lehiaketa honen, pilotariez haragoko garrantziaren adibiderik onena". Guztiek pilotalekura hurbiltzeko deia egin diete Iruñeko eta inguruko pilotazaleei, "ez bakarrik pilotariak animatzeko, baizik eta ziur daudelako ikuskizunak asko mereziko duela", zehaztu dute antolatzaileek.