Final-laurdenetan esan dio agur Tolosak Herriarteko Pilota Txapelketari gomazko paletan. Hernaniren aurka 4-2 galdu arren, aukerak bazituzten joaneko jardunaldian lortutako 2-1koari buelta emateko, galdutako partidetan tanto kopuru handia lortu baitzuten. Beotibarren jokatu zituzten itzulerako partidak eta berriro ere 2-1 galdu zuten: banaka 20-14 irabazi, binaka 9-20 galdu eta banaka 7 koadroaren barruan 12-20 galdu.
Eskuzko modalitatean final-laurdenetan murgilduta daude, eta Tolosa eta Amezketa dira lehian jarraitzen duten eskualdeko ordezkariak. Tolosak du aukera gehien finalerdietara pasatzeko, Azkoitiaren aurka 2-1 irabazten ari delako joaneko jardunaldia eta gero. Azkoitian jokatu zituzten partida horiek, eta kadeteetan 22-6 galdu eta jubeniletan eta nagusietan 12-22 irabazi zuen Tolosak. Itzulerako jardunaldia Beotibarren jokatuko dute, gaur, 20:00etatik hasita.
Amezketak oso zaila du aurrera egitea, Oiartzunen aurkako kanporaketan 3-0 galtzen ari baita. Joaneko jardunaldia Amezketako Larrunarri frontoian jokatu zuten, eta kadeteetan 1-22, jubeniletan 14-22 eta nagusietan 7-22 galdu zituen Amezketak partidak. Oiartzungo Madalensoro pilotalekuan jokatuko dituzte itzulerako partidak, gaur, 18:00etan hasita.