Bi urteko etenaren ondoren, Harituz Tolosaldeko Bertsozale Taldea bere eguna ospatzen ari da Iruran eta Anoetan. Eguerdian, bertso poteoa egin dute Irurako tabernetan, trikitilarien laguntzarekin, eta ondoren, Anoetako Kuku elkartean bazkaldu dute. Bazkalostean bertso saioa izango da elkartean bertan, eta iluntzean, berriz, kalejira egingo dute Anoetako tabernetan zehar, Laskotxarangarekin.
Bertsoa erdigunean jarriz Tolosaldeko bertsozaleak elkartzea helburu duen ospakizuna da Harituz eguna. «Eskualdean bertsotan dakien jende mordoa dago baina gehienak ez dira eroso sentitzen testuinguru formal edota txapelketako saioetan. Aurtengo helburua jende horri kanturako aukera eta testuinguru atsegina eskaintzea da» esan dute elkarteko kideek.
