Hirugarren eta laugarren postuak erabakitzeko partida, bertan behera

Tolosaldeko Ataria 2022ko mai. 16a, 14:11

Altuna III.ak eta Jakak igandean jokatu behar zuten hirugarren eta laugarren postuak erabakiko zituen partida, Zumaian; Altuna III.ak uko egin dio partida jokatzeari, eskuko minez dagoelako.

Altunak eta Jakak ez dute buruz buruko finalerako sailkatzea lortu asteburuan. Amezketarrak, Lasoren aurka galdu zuen larunbatean; lizartzarrak, berriz, ez zuen aukerarik izan, atzo, Ezkurdiari irabazteko. Ondorioz, bien arteko lehia izango zen igandean, Zumaiako Aitzuri pilotalekuan, hirugarren eta laugarren postuak erabakitzeko. Azkenean, baina, amezketarrak ez du jokatzerik izango. Hala jakinarazi dio Aspe enpresak EPEL-i.

Egoera honen aurrean, eta araudiak atzerapenik onartzen ez duenez, partida galdutzat eman diote amezketarrari. Beraz, Jaka izango da aurtengo txapelketako hirugarren sailkatua, eta Altuna, laugarrena.

Artola, San Fermin torneoan

Larunbatean, azkenean, binakako partida jokatuko du Jakak Zumaian. Imazekin osatuko du bikotea, eta Irribarriaren eta Tolosaren aurka jokatuko dute. Aurrez, Lau eta Erdiko San Fermin torneoko aurre-kanporaketako partida jokatuko dute Bakaikoak eta Artolak; 17:00etan hasiko da jaialdia, eta alegiarrarena lehen partida izango da.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!