Hainbat herri izan dira San Isidro eguna ospatu dutenak eskualdean. Horietako bat Asteasu izan da. Eguraldia lagun eta giro aparta izan dute herrigunean goiz guztian zehar. Izan ere, triki-bertso kalejira egin dute tabernaz taberna herriko trikitilariekin eta Julio Soto eta Amaia Agirre bertsolariekin batera. Ondoren, bazkaltzera joan dira Iturriondo jatetxera, eta bazkalostean trikitilari eta bertsolarien beste saio bat eskaini dute.
Ohiturak jarraituz, Amasan ere baserritarren eguna ospatu dute. Bertsoak alde batera utziz, hauek herri kirol saioa antolatu dute, eta bero zakarrarekin egin behar izan dituzte kirolariek lanak. Herriko plazako elizaren itzala eskertu dute ikusleek gaurkoan. Herri kirol saioaren ostean, bazkaltzera joan dira Iturrigoxo jatetxera.