LABek greba deitu du Gipuzkoako adinekoen egoitzetan maiatzaren 19rako lan hitzarmena eta lan ratioak hobetzea eskatzeko. "Argi dago egoera hau zerbitzu publikoen pribatizazioaren, lan prekarietatearen eta sektore feminizatuek duten errekonozimendu sozial eta ekonomiko ezaren ondorio dela", azaldu du sindikatuak. Gaineratu du hau ez dela sektoreko langileen eta patronalaren arteko lan gatazka soil bat, gipuzkoar guztiei eragiten dien auzi soziala baizik, "kalitatezko zaintza zerbitzuak jasotzeko eskubidea edota zaintza lanak baldintzarik duinenetan egitekoa urratuak izaten ari direlako".
Azaldu du bi urteren ostean erabat blokeatuta zegoen negoziazio mahaia biltzea lortu dutela, eta gehitu du patronalaren eta Gipuzkoako Foru Aldundiaren erantzukizuna dela mahaia berriro ez blokeatzea. "Edukiez hitz egiten hasteko momentua den honetan, borondateetatik haratago, proposamen zehatzak mahai gainean jarri beharko dira". LABen ustez borroka da bide bakarra eta herrialdeko lan hitzarmena eta ratioen hobekuntzak ezinbesteko baldintzak dira gatazka honi irtenbidea emateko. "Sektoreko langileek aurrera daramaten borroka nekaezin eta eredugarria babestu eta presio sozial zein sindikala biderkatzeko unea da. Horregatik, ezinbestekoa izango da langile guztien inplikazio eta elkarlana, batasun sindikaletik hasi eta egoiliarren senideen elkarteen zein mugimendu sozial ezberdinen artean aliantzak eraikitzeraino".