Eskuineko eskua minduta zuenez, buruz buruko ligaxkaren bigarren partida jokatzeari uko egin zion Altuna III.ak. Ezkurdiaren aurka zuen partida hori, eta larunbat honetan Atano III.a frontoian Zabaletaren aurkakoa jokatzeko moduan egongo ote zen zalantza zegoen. 45 minutuz aritu da proba egiten eta prest dagoela esan du amezketarrak: "Gustura sentitu naiz eta oso pozik nago. Orain dela bi aste ez nuen espero, baina borrokarako prest nago eta ilusio handiarekin larunbaterako".
Larunbatean jaialdia 17:00etan hasiko da, eta Altuna eta Zabaletaren artekoa bigarren partida izango da. Irabazten duenak Lasoren aurka jokatuko du finalerdia, maiatzaren 14an, larunbatean, Bizkaia frontoian.
Jaka eta Artola, igandean
Beste finalerdia zeinek jokatuko duen igandean erabakiko da, Jaka eta Artolaren arteko lehian. Bizkaia frontoian izango da partida hori, 17:00etan hasiko den jaialdiaren bigarren partidan. Irabazten duenak finalerdietan Ezkurdia izango du zain, eta partida hori maiatzaren 15ean, igandea, jokatuko da Eibarko Astelena pilotalekuan.
Buruz buruko ligaxkaren hirugarren jardunaldian jokatzekoak ziren beste bi partidak bertan behera geratu dira. Batetik, Laso eta Rezustaren artekoa, Lasok sorbaldan mina duelako. Bestetik, Ezkurdia eta Darioren artekoa, azken horrek eskuetako minez amaitu zuelako Zabaletaren aurkako partida.