Diva Pentsuak enpresak eta Leaburu-Txaramako Udalak antolatuta, Urrezko Banakako Aizkolari Txapelketa Eusko Label Sariko lehen kanporaketako saioa jokatu da Leaburuko industrialdean. Hamabi aizkolari aritu dira bertan, tartean, Ibon Garaiburu berastegiarra. Ondorengo aizkolariak aritu dira Garaibururekin batera: Urtzi Olasagasti, Dani Lopez, Xabier Garcia Utxu, Beñat Lekue, Aritz Oregi, Beñat Amade, Mikel Agirre, Aritz Irazabal, Ioritz Gisasola Zelai IV.a, Jon Telletxea eta Josu Santamaria.
Lehen fasean, hiru multzotan banatu dituzte aizkolariak, eta multzo bakoitzeko bi onenek egin dute aurrera gaurko kanporaketan: A multzotik, Zelai IV.ak eta Mikel Agirrek; B multzotik, Lopezek eta Garaiburuk; eta C multzotik, Lekuek eta Irazabalek. Gero, banakako lehian aritu dira sei aizkolariak. Garaiburu Zelai IV.aren aurka aritu da, baina ezin izan du bizkaitarra garaitu; bera izan da, gainera, gaurko aizkolari onena. Gainerako aurrez aurrekoetan, Irazabal eta Lekue izan dira onenak. Ondorioz, hirurek egin dute aurrera txapelketan, eta datorren asteburuan Zumaian jokatuko den kanporaketan izango dira.
Gizonezkoen txapelketaz gain, Emakumezkoen Aizkolari Txapelketako kanporaketa ere jokatu dute Laiene Pikabeak eta Uxue Ansorregik. Launa enbor moztu dituzte; lehena, erlojuaren aurka, eta ondorengo hirurak abiadurako proban. Bietan ere Pikabea izan da onena, eta berak egin du aurrera txapelketan.
Harri-jasotzaileak ere aritu dira Leaburun. Berez, Urrezko Harri-jasotze Txapelketako kanporaketa jokatzekoak zen Julen Diaz, baina azkenean, erakustaldia eskaini du. Emakumezkoetan, aldiz,Karmele Gisasola Zelai III.ak, txapelketako kanporaketa jokatu du. Bi minutuko bi tanda egin ditu; lehena, 63 kiloko harri kubikoarekin, eta bigarrena, pisu bereko bolarekin. 15 jasoaldi eman dizkio kubikoari; bolari, berriz, 23 jasoaldi.