Pasa den astean, XXX. Goñiren Oroimenezkoa txapelketako finalak jokatu zituzten Zumarragako Beloki frontoian. 500 pilotazale inguru elkartu ziren, afizionatu mailako txapelketa garrantzitsuenetako bateko azken partidak ikusteko.
Eskuz binakako finalean, eskualdeko lau pilotarik jokatu zuten. Eneko Labaka albizturtarrak eta Julen Aizpuru asteasuarrak osatu zuten bikoteetako bat; bestea, berriz, Iñaki Elola bidaniarrak eta Aratz Irazustabarrena alegiarrak. Elolak eta Irazustabarrenak zenbait akats egin zituzten, eta Labakak (partidako pilotari onena izendatu zuten) eta Aizpuruk 15-7 aurreratzea lortu zuten. Galtzaileek aldea murriztea lortu zuten (14-17), baina beranduegi izan zen, 17tik 22ra zuzenean joan baitziren txapeldunak. Txapelketako beste finalean, lau eta erdikoan, Ekhi Irribarriak 22-21 irabazi zion Unai Amianori.