Erik Jakak eman du ezusteko handiena Eskuz Banakako Buruz Buruko Txapelketako final-zortzirenetan. Irribarriaren aurka jokatu zuen bere kanporaketa, Eibarko Astelena frontoian, eta 22-15 irabazi zuen. Garaipen honi esker, final-laurdenetako ligaxka jokatuko du lizartzarrak, eta Beñat Rezusta izango da bere lehen aurkaria. Ostiral honetan jokatuko dute, Bergarako Udal Pilotalekuan; 22:00etan hasiko den jaialdiko bigarren partida izango da.
B multzoan daude Jaka eta Rezusta, eta multzo horretan, Baiko enpresako beste bi pilotari daude, tartean, eskualdeko bat: Iñaki Artola. Alegiarrak, Unai Laso, azken binakako txapelketako finalista, izango du aurkari lehen partidan. Zumaiako Aitzuri frontoian jokatuko dute, astelehenean; 17:30ean hasiko den jaialdiko bigarren partida izango da.
Hain justu, Lasok, eskualdeko beste pilotari bat kanporatu zuen final-zortzirenetan, Lekeition: Jon Ander Peña tolosarra. Peña II.ak ez zuen partida ona jokatu eta 22-13 galdu zuen, txapelketatik kanpo geratuz.
Txapelduna, A multzoan
Jokin Altuna, Buruz Buruko egungo txapelduna, A multzoan dago. Igandean jokatuko du lehen partida, Bilboko Bizkaia pilotalekuan, Darioren aurka. Errioxarrak, 22-5 irabazi zion Urrutikoetxeari final-zortzirenetan.
Ezkurdiak eta Zabaletak jokatuko dute multzo horretako beste partida, larunbatean, Iruñeko Labrit pilotalekuan. Ezkurdiak 22-7 irabazi zion Agirreri final-zortzirenetan.