Tolosaldea Garatzenetik azaldu dutenez, programa bi fasetan banatzen da: lehenik, izena eman duten guztiek taldean 80 orduko formazio fase bat jasotzen dute. Maiatzaren 2tik 24ra izango da, astelehenetik ostiralera, Lehiberri Zentroan, 09:30etik 14:30era.
Tolosaldea Garatzeneko Enplegu Saileko arduradunek gidatutako oinarrizko konpetentzia sozioprofesionalak garatzeko eta enplegu bilaketa hobetzeko saioak izango dira, eta autonomia, motibazioa, espektatiben kudeaketa, komunikazioa, gatazken kudeaketa, erabakiak hartzeko gaitasuna edota plangintza jorratuko dituzte. Talde-dinamikak ere egingo dituzte, eta amaieran jarraipen pertsonala izango dute parte hartzaileek.
Lehen fase hori amaituta, ekainetik irailera bitarte, Tolosaldeko enpresa edo erakunderen batean, udaletan esaterako, praktikaldia egingo dute, norberaren profilera egokitutako lanpostuetan, lan-esperientzia hartzeko eta lan-aukerak sustatzeko.
Izen-ematea martxan
2022ko lehen taldea osatzen ari da Enplegu Saila, eta apirila amaierara arte izango da izena emateko aukera. Horretarako, lan@tolosaldea.eus helbidera idatzi edo Tolosaldeagaratzen.eus webguneko Hazilan gunean datuak bete beharko dira.
Irailean ere Hazilan programaren bigarren talde bat osatzeko asmoa dutela azaldu dute, nahiz eta horretarako datak oraindik ez dituzten finkatu. Dena dela, interesatuek Enplegu Sailarekin aipatutako bideetatik harremanetan jartzeko aukera dute.