Euskal Herriko Pentsiodunen Mugimenduak deituta manifestazioak egin dituzte gaur goizean, Bilbon, Iruñean eta Lizarran, pentsioen erreformaren aurka. Tolosaldeko pentsiodunak Bilboko manifestazioan hartu dute parte. Salatu dutenez, erreforma horrek erosteko ahalmenean "murrizketa larria" dakar.
Bilboko Udalaren aurrean, ohar bat irakurri dute antolatzaileek, eta bertan salatu dute joan den abenduko pentsioen erreformak "egindako promesak ez dituela betetzen»"eta beren aldarrikapenen "zati handiena" baztertzen duela.
Konpromisoa "pentsio publikoen erosteko ahalmena KPI errealaren arabera mantentzea" zela adierazi dute, eta gaineratu dute "2021an soilik kotizaziopeko pentsioak % 3 pobretu direla, eta gutxienekoak eta kotizazio gabekoak % 2,5", eta "gutxieneko pentsioak miserableak direla eta oso urrun daudela eskatzen dituzten 1.080 euroetatik".