Mintzalaguna egitasmoa euskaraz hitz egin ohi duten pertsonak, euskaraz egin nahi duten pertsonekin euskaraz aritzeko eta elkartzeko programa da. Mintzalagun taldeek gainera urtean zehar hainbat ekintzatan ere parte hartzen dute, hala nola, Durangoko azokara egun pasa egiten dute, Olentzeroren etxera bisita, Mintzatxotxa eta Mintza Eguna, besteak beste.
Egitasmoaren barruan eta proiektua ezagutzera emateko asmoz Mintzapoza tonbola jarri dute gaur Tolosan eta herritar ugari gerturatu da. Katiluak, bolalumak, poltsak eta termoak banatu dituzte.
Galtzaundi Euskara Taldeak gogoratu du Mintzalagun taldeetan izen ematea doakoa dela eta ikasturte osoan dagoela irekita. Beraz, parte hartu nahi duenak herriko udaletxera edota euskara taldearen egoitzara jo behar du izena ematera. Bestetik, online ere izena eman daiteke.