Euskal Herriko Pentsiodunen Mugimenduak lau urte beteko ditu larunbatean, hilaren 15ean, eta urteurrenaren harira, manifestazioa egingo dute Donostian, eta Hego Euskal Herriko beste hiru hiriburuetan eguerdian. Manifestazioa baina, ez da egingo duten mobilizazio bakarra izango. Aste hasieratik, esaterako, Donostian, Egiako Txoko Internazionalistan itxialdia ari dira egiten hainbat pentsiodun, eta tartean dira Tolosaldekoak ere.
«Gauez Internazionalisten Txokoan gaude, eta egunez larunbaterako deialdiaren berri ematen ari gara herritarrei kalean, eskuorriak banatuz eta kotxeetan megafonia bidez», esan du Iñaki Elduaienek Tolosaldeko Pentsiodunen Mugimenduko kideak.
Elduaienek azaldu duenez, larunbatean «ahalik eta jende gehien» azaltzea da helburua, «mugimendua indartsu dagoela erakusteko». Orain arte egindako bidea «oso positiboa» izan da pentsiodunen ustetan; «mugimendua hasi zenean hilabete batzuetarako izango zela uste genuen, baina, aldarrikapenek jarraitzen dute, mugimendua egonkortuta dago, eta garbi ikusten duguna da jarraitu egin behar dugula».
Aldarrikapen batzuk lortu dituzte, baina, oinarrizko hainbat lortu arte borrokan jarraituko dutela diote: «Pentsioen publikotasuna eta 1.080ko gutxieneko pentsioa izatea izango dira 2022an lehentasunezko aldarrikapenak».
Pentsiodunen Mugimenduak lau urte betetzen ditu, eta itxialdia ari dira egiten Donostian, tartean Tolosaldeko pentsiodunak; larunbatean manifestaziorako deia egin dute.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!