Aralarren babestutako ekosistemak suntsitu dituztela salatu dute

Iturria: Landarlan

Eguzki eta Landarlan elkarteek salaketa jarri dute ezezagunek Aralarren ote eta txilar desbrozeak egin dituztelako. 

Eguzki eta Landarlanek esan dute irailaren amaieran eta urriaren hasieran, ezezagun batzuk ote eta txilar desbrozeak egin zituztela, ustez, baimenik gabe, Enirio aldean, Aralarko Parke Naturalean eta Natura 2000 Sareko Kontserbazio Bereziko Eremuan, 20 Ha-ko eremuan. "Horietako asko mendi babeslean daude. Salatutako otadi eta txilardi sastraka garbitzeak eragina izan ahal du interes komunitarioko sei habitatetan", zehaztu dute.

Landarlan elkarteak esan du era berean, eskualdeko elkarte gisa, informazio publikoa eskatu ziola Enirio- Aralarko Mankomunitateari, aipatutako lurren jabe bezala, eta bi hilabete igaro ondoren ez duela erantzunik jaso. "Halaber, Gipuzkoako Foru Aldundiari, Parke Naturalaren kudeaketaz arduratzen den administrazioa den aldetik, jendaurreko informazioa eskatu diogu, eta gertatutakoa aztertuko zutela erantzun ziguten, baina gero ez dugu beste erantzunik jaso". Egoera ikusita Eguzkirekin batera gertaera salatu du Ingurumen Fiskaltzan. "Baimenik gabe egindako ekintza izan dela frogatzen bada, delitu izateaz gain ekintza oso larria izango litzateke, Aralarren edonork edozer gauza egiteari ateak irekiko bailioke, eta administrazio eta erakunde kudeatzaileen aldetik erantzun bateratu eta irmoa jaso beharko litzatekeela uste dugu".

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!