Astelehenean 38 urteko emakume bat erail zuen bere bikotekideak Tuteran. Gaur arratsaldean, Akain eta Lurgatz talde feministek eta Aiztondoko Mugimendu Feministak «nazkatuta» daudela esan eta indarkeria matxista lehen mailako arazo politikotzat hartua izan dadin eskatu dute Villabona eta Zizurkil arteko zubian egindako elkarretaratzean: «Egungo jarrera konplizeak alboratu eta bizi garen jendarte antolaketa sexistari aurre egiteko benetako neurriak behingoz har daitezela exijitzen dugu».
Autodefentsa feministarako deia luzatu eta eurena bizitzaren aldeko apustu erradikala dela esan dute bildutakoek. «Bizi dugun osasun krisi honetan biltzeko eta harremantzeko inoiz baino oztopo gehiago ditugu. Badakigu zaintza sareak ezinbestekoak direla indarkeria sexistari aurre egiteko, pandemiarekin modu berriak bilatu behar izan ditugu harremanak zaintzeko, baina inoiz ez dugu indarkeriaren aurka borroka egiteko indarra galdu», aldarrikatu dute. «Elkarrekin borrokan jarraituko dugu denak aske izan arte».
2003tik 113 emakume erail dituzte Euskal Herrian. Aiztondoko talde feministen ustez, biolentzia matxistaren pandemiak mendeak daramatza mundu honetan eta feminismoa da dagoen antidoto bakarra horri aurre egiteko. Autodefentsa feministarako deia egiten eta Tuterako erailketa salatzeko gaur elkarretaratzeak egingo dituzte 19:00etan, Tolosako Trianguloan eta Anoetako plazan.