Ostalarien haserrea eta herritarren babesa

Urtea Amasa-Villabonako intzidentzia tasa altuarekin hasi zen, ondorioz ostalaritzak itxi egin behar izan zuen. Amasa-Villabonan hasi ziren gorabeherak, baina eskualdeko herri asko pasa dira azken hilabeteetan egoera horretatik.

Bien bitartean manifestazio jendetsuak egin dira Amasa-Villabonan eta Tolosan, eta bestelako ekitaldiak egin dituzte ere: auto-karabanak, bertso saioak...

Gipuzkoako Foru Aldundiari plan bat garatzeko eskaera luzatu zioten ostalariek, zuzeneko laguntzak, zerga abantailak eta positiboek eragindako itxierak adostu ahal izateko. «Komunikazioak nahikoa denborarekin izatea eskatzen dugu. Zergatik ematen dira laguntzak hain berandu? Laguntzak baino gehiago konpentsazioak behar ditugu. Negozio itxiek galera handiak besterik ez dituzte sortzen», esan zuten.

Lan egiteko aukera eskatzen zuten ostalariek, eta funtsezkoak zirela argudiatu zuten. «Guztiok dakigu kudeaketa ez dela erraza, baina, era berean, denok dakigu gauzak ez direla behar bezala egiten ari». Indemnizazioak eskatzeaz gain, ezartzen zaizkien neurriek gogor eragiten dietela azaldu zuten. «Ezin dugu horrela jarraitu, orain ireki, orain itxi. Diru laguntzak egongo zirela hitzeman zuten, baina oraingoz ez dugu horrelakorik jaso», salatu zuten mobilizazioetan.