Porrot bana eskualdeko lau pilotarientzat, binakakoan

Eskualdeko pilotariak ez dira batere ondo ari 2021eko Lehen Mailako Eskuz Binakako Txapelketan. Bosgarren jardunaldian laurek galdu dute, eta une honetan, sailkapeneko azken lau postuetan daude.

Atzo eman zioten amaiera bosgarren jardunaldiari, Tolosako Beotibar frontoian. Bertan, Jakak eta Mariezkurrenak, Irribarriaren eta Rezustaren aurka jokatu zuten. Lehen tantoetan, Aspeko bikoteak ezarritako erritmoaren aurrean ezinean aritu ziren Baikokoak. Gero, ordea, markagailua iraultzea lortu, eta abantaila txikia zabaldu zuten: 12-7. Bigarren atsedenaldiaren aurretik, bazirudien amaiera parekatua izango zuela partidak, bi berdinketa izan zirelako: 15-15 eta 16-16. Amaieran, Irribarria ondo eta Jaka kamuts aritu ziren. 22-16 amaitu zen partida.

Altuna III.ak ostiralean jokatu zuen, Urdulizen, Martijarekin bikotea osatuz, Urrutikoetxearen eta Arangurenen aurka. Hasi eta buka, jaun eta jabe izan ziren Baikoko pilotariak. 6-0 aurreratu ziren, eta Aspeko bikotea bi tantora gerturatu bazen ere, 22-4koa izan zen azken emaitza; amezketarrak, beraz, ezin izan du garaipena lortu kantxetara itzuli den asteburuan.

Larunbatean, Peña II.aren txanda izan zen. Albisurekin batera, Elezkano II.a-Zabaleta bikotearen aurka neurtu zituzten indarrak, Iruñeko Labrit pilotalekuan. Ostiralekoaren aldean, erabat ezberdina izan zen partida. Baikoko pilotariek estu eta larri ibili zituzten egungo txapeldunak; amaieran, tolosarrak eta ataundarrak aukerak izan zituzten garaipena lortzeko. Baina azkenean, 22-21 nagusitu zen Aspeko bikotea; Peñak txapara bidali zuen azken pilotakada.

Igandean, Xabi Tolosaren txanda izan zen. Anoetarrak, Ezkurdiarekin batera, ezin izan zuen txapelketako bigarren garaipena lortu. Laso-Imaz bikotea izan zuten aurrean, eta partida hasiera parekatua izan bazen ere, bi atsedenaldietara alde handiarekin heldu ziren Baikokoak: 12-5 eta 18-9. Amaieran, 22-13 nagusitu ziren.

Aste honetan jokatuko dituzte seigarren jardunaldiko partidak, eta tartean bi derbi izango dira. Larunbatean, Ezkurdia-Tolosa eta Jaka-Mariezkurrena II bikoteek elkarren aurka jokatuko dute, Iruñeko Labrit pilotalekuan. Igandean, berriz, Altuna III.ak eta Martijak, Peña II.a eta Albisu izango dituzte aurkari, Bilboko Bizkaian.

Txanponaren beste aldea

Une gozoagoa bizitzen ari dena Iker Elizegi asteasuarra da. Bakaikoarekin batera, Promozio Mailako Binakako Txapelketako partida guztiak irabazi ditu: bostetik bost. Larunbatean, Labriten jokatu zuten partida, Zabala-Oier Etxeberria bikotearen aurka eta 22-16 irabazi zuten. Larunbatean, Eguberri egunean, jokatuko dute hurrengo jardunaldiko partida, berriz ere, Labriten. Kasu honetan, Egiguren V.a eta Untoriaren aurka neurtuko dituzte indarrak.