Gaur ere hotelean lo eginda indarrarekin hasi dugu eguna, ondo deskantsatuta. Azken orduko material aldaketak egin ditugu ibilgailuetan, batetik bestera poltsak, kaxak eta beste pasa, eta ferrirako prestatu gara. Autoak ere banan-banan sartu ditugu barrura.
Arratsaldean jaso ditugu atzo egin genituen PCR proben emaitzak. Eta bai, guztiok goaz. Denon emaitza negatiboa izan da eta bidaiarekin jarraitu dezakegu. Emaitzak jaso artean izandako urduritasunaren ondoren badator ferrirako garaia.
Olatuek eta haiek eragindako balantzek lorik egiten uzten badigute, bihar Arjelian esnatuko gara. Ibilgailuak deskargatu eta basamortuko hondar gainean egingo ditugu kilometro eta kilometroak, gutxienez beste hiru egunez. Saharako errefuxiatuen kanpamentuetara asteazkenean iristea aurreikusten dugu, gauzak ondo bidean. Basamortuan ez daukagu Internet konexiorik ziurtatuta, beraz, ez dakit bihar arte esan, edo astezkenera arte esanda agurtu.
Izan ondo!
Tolosako Udalak babestutako bidaia
