Ataria Irratia-ren 2021-2022 lan-urtea irailaren 13an hasiko da, hurrengo astelehenean, beraz. Azken urteetan bezala, herritarrei irratiko estudioa zabaldu nahi zaie Saio libreak atalean. 20:00etatik aurrerako tarte horretan, edonork egin ahalko du bere saioa, nahi duen gaiaren inguruan. Banaka edo taldean, aurrez grabatuta edo zuzenean... norberaren baldintzetara egokituriko saioa izango litzateke. Norberak erabakiko luke zer eta nola egin.
Horretarako, Tolosaldeko Ataria-rekin jarri behar da harremanetan, 943 65 56 95 zenbakira deituta edo ataria@ataria.eus helbidera mezua bidalita.
Saio horiekin batera, denboraldi berrian 09:00etatik 13:00etara, astean zehar, Pasahitza magazina izango da. Eskualdeko aktualitatea ekarriko dugu Ataria Irratia-ra protagonisten hitzetan. Atal eta kolaboratzaile berriek ere euren ekarpena egingo diote goizeko saioari, euskal musikak bezala. 15:00etatik 16:00etara, astelehenetik ostiralera, podcast-en txanda izango da. Besteak beste, natura, baserri mundua, kultura eta herri kirolak jorratuko dira ordubeteko tarte horretan.
Irratsaio bat egin nahi duenak 'Ataria'-ko estudioa zabalik dauka
Ataria Irratia-k saio libreak egiteko erraztasun guztiak jarri nahi ditu: bakarka edo taldean; zuzenean edo aurrez grabatuta...
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!