Tolosaldea ezagutzera etorri diren bisitarien gorakada "izugarria" izan dela esan du Tolosaldea Garatzenek. Iazko udaran beherakada eman zen pandemiaren ondorioz, baina aurtengoa 2019ko datuak hobetu direla argitu du, hori ondorioztatu daiteke behintzat, Tolosaldeko Turismo Bulegoak uztailean eta abuztuan jaso dituen datuak ikusita.
Azken bi hilabeteetako datuak kontuan hartuta, bataz beste %39 igo da bulegoak jaso duen bisitari kopurua, eta eskualdeko nekazalturismo, landetxe eta landa apartamentuetako okupazioa %87koa izan da abuztuan, 2019ko datuak hobetu direlarik. Bisitari gehienak kataluniarrak izan dira, eta ondoren madrildarrak, valentziarrak eta andaluziarrak izan dira.
Tolosaldea Garatzenek esan du era berean, 2021eko udan eskaintza zabaldu dela Tolosaldean eta Orexan Iriarte eta Orexa Enea apartamentuak ireki direla, Larraulen Agerre Berri landetxea eta Arkaitza landetxea Berrobin. Horiekin 49 establezimendu daude orain eskualdeko 19 herritan, 609 plaza eskainiz. Plaza horietako gehienak Tolosan daude (%36) eta Asteasu du atzetik (%13). Establezimendu eta plaza kopuruari begiratuta plaza gehienak nekazalturismo eta landetxeetan daude, horietako 173 plaza daudelarik eskualdean.
Gastronomia sustatzeko kanpaina berria
Turismo gastronomia sustatzeko kluba da Tolosa Gourmet eta eskualdeko turismo gastronomikoa ezagutzera emateko kanpaina berri bat abiarazi du. Klubeko kide diren establezimenduetara sartzeko gonbita egitea dute helburu eta horretarako bideo batzuk prestatu dituzte Tolosaldean Apetit On, etorri eta dastatu izenpean. Bideo bakoitzean etxe bakoitzeko protagonista ageri da bere produktu izarra prestatzen, establezimendua bera eta eskualdea erakutsiz. Sei bideo egin dituzte eta Iriarte jatetxea, Rafa Gorrotxategi gozogilea, Txumitxa piper ekoizlea, Hika txakolindegia, Bailara jatetxea eta Ama taberna dira protagonistak. Bideoak Pablo Dendaluzek egin ditu eta Joxe Mari Barriolaren umorea dute ardatz. Bideoak uztailetik abendura bitarte argitaratuko dituzte, hilabetean bideo bana zabalduz. Orain arte Iriarte jatetxean eta Rafa Gorrotxategi gozogilearekin egindakoak argitaratu dituzte.