Caixabank Masters binakako pilota txapelketaren laugarren jardunaldi gaur Dimako pilotalekuan jokatuko den partidarekin borobilduko da. Bertan Peña tolosarrak eta Rezustak osatutako bikoteak Elezkanok eta Marizkurrenak osatutakoaren aurka jokatuko du, 22:00etatik aurrera.
Hiru partida jokatuta hiru garaipen eskuratu dituzte Peñak eta Rezustak, eta 3 punturekin hirugarren postuan daude sailkapen orokorrean.
Laugarren jardunaldiko partida jokatuta, Urrutikoetxea eta Martija ere 3 punturekin daude lehen postuan. Etxeberria-Albisuren aurka jokatu zuten larunbatean, eta 12-8 bukatu zen norgehiagoka, Etxeberria lesionatu ostean.
Larunbatean Altuna-Aranguren eta Olaizola-Zabaletaren arteko partida ere izan zen. Amezketarrak eta Arangurenek osatutako bikoteak 22-7 galdu zuen, eta ondorioz, 3 punturekin jarraitzen dute, hirugarren postuan.
Ostiralean, bestalde, Ezkurdia-Imaz eta Jaka-Tolosaren arteko partida izan zen. Lizartzarrak eta anoetarra osatutako bikoteak 22-13 galdu zuen. Lau partida jokatuta, puntu bakarrarekin zortzigarren postuan daude.