Larunbat arratsaldean jokatu ziren Zikuñaga Papelera txapelketako finalak Hernanin, eta eskualdeko hiru pilotarik jantzi zituzten txapelak: Intxurre taldeko Julen Oiarbide, Aratz Irazustabarrena eta Iker Zubeldiak. Uztailaren 1ean hasi zen Zikuñaga Papelera txapelketaren hirugarren edizioa, 22 klubetako 104 esku pilotarirekin, eta uztaila amaitzearekin batera amaitu dute txapelketa bera ere.
Nagusien bigarren mailako finala jokatu zuen Oiarbide alegiarrak, Larraun taldeko Galartza bikote zuela. Oiarpeko Etxaberen eta Olaizen aurka 18-15 irabazi zuten. Eta nagusien lehen mailan, Irazustabarrena alegiarrak Zubeldia altzotarra izan zuen bikote eta 18-9 irabazi zuten Añorgako Urmenetaren eta Zazpi Iturriko Beñat Beloki bedaiotarraren aurka.