Gipuzkoako Foru Aldundiak ohorezko ekitaldia egin zuen, atzo eguerdian, Donostiako Gipuzkoa Plazako eraikinean. Bertan, Erik Jaka lizartzarra eta Jokin Altuna amezketarra, Buruz Buruko Txapelketaren azken bi edizioetako irabazleak, omendu zituzten.
Markel Olano diputatu nagusiak eta Arkaitz Millan, kultura, lankidetza, gazteria, eta kirol diputatuak egin zieten harrera pilotariei. Lortutako azken txapelak ez ezik, orain arte erdietsi dituzten lorpenak nabarmendu zituen Olanok: "Pilotari belaunaldi oso indartsua dugu lurraldean eta, zalantzarik gabe, Erik eta Jokin koadroko izen handien artean daude dagoeneko".