Eskualdeko eskalatzaileak, gorengo mailan

Tolosaldeko Ataria 2021ko uzt. 27a, 19:59
Ezkerretik eskubira: Intza Elizalde, Maddi Agirre eta Udane Mujika.

Udane Mujika elduaindarrak eta Intxa Elizalde tolosarrak domina bana irabazi dute Lugon jokatu diren Overall modalitateko infantil eta kadete mailetako Espainiako Txapelketetan.

Asteburuan, eskaladako Overall modalitateko Espainiako Txapelketak jokatu dira Lugon (Galizia). Bertan, eskualdeko bi eskalatzaile izan dira. Batetik, Udane Mujika elduaindarra, infantil mailan; bestetik, Intza Elizalde tolosarra, kadete mailan. Bata zein bestea Club Vasco de Camping elkarteko eskalatzaileak dira, baina kasu honetan Euskal Selekzioarekin hartu dute parte. Overall modalitateak hiru proba ezberdin barne biltzen ditu: abiadura, blokea eta zailtasuna edo soka.
 
Emaitzei dagokienez, Mujika zazpigarren izan da; Club Vasco de Camping elkarteko eskalatzailea den Maddi Agirre ordiziarra izan da txapelduna. Taldeka, bigarren postua lortu dute Mujikak eta Agirrek, Ines Allende eta Gari Markuerkiaga eskalatzaileekin taldea osatuz. "Meritu handiko emaitza izan da, sei kiderekin lehiatu ordez, laurekin aritu direlako", adierazi dute elkartetik.
 
Bestetik, Elizalde tolosarrak ere lortu du podiumera igotzea, eta hirugarren postuan sailkatu da kadete mailan. Taldeka, ordea, seigarren izan da, Asier Antunez eta Garazi Uriarterekin batera.
 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!