Heldu da azken hilabeteetako prestaketa fisikoaren helmuga zeharkatzeko momentua. Tokion (Japonia), koronabirusaren pandemia hedatzen hasi zen eremutik gertu, milaka kirolari lehiatuko dira, etzi hasi eta abuztuaren 8ra bitarte ospatuko diren 2020ko Olinpiar Jokoetan.
Tartean, Euskal Herriko 30 kirolari lehiatuko dira, baina ez da eskualdeko ordezkaririk izango. Leire Olaberria ikaztegietarra eta Xabier Fernandez ibartarra izan ziren azkenak, 2012ko Londresko Olinpiar Jokoetan. Denera, eskualdeko hamahiru kirolarik hartu izan dute parte, lau domina eskuratuz.
ESKUALDEKO KIROLARIAK
Paris 1924. Gabino Lizarza (Berastegi), pisu jaurtiketan (atletismoa); Felix Gastesi (Tolosa), esku pilotan; eta Akilino Sagarna, Benedikto Santamaria eta Jose Andres Garate Garate II (Amasa-Villabona), zesta puntan (dominarik gabeko kirol modalitateak, erakustaldikoak).
Amsterdam 1928. Ignacio Alkorta eta Jesus Izagirre (Tolosa), futbolean; Fernando Muñagorri (Asteasu), atletismoan.
Seul 1988. Ibon Urbieta (Tolosa), arraunean.
Bartzelona 1992. Urbieta, arraunean; Ainhoa Artolazabal (Tolosa), txirrindularitzan.
Atlanta 1996. Abraham Olano (Anoeta), txirrindularitzan (zilarrezko domina, erlojupeko lasterketan).
Sidney 2000. Olano, txirrindularitzan.
Atenas 2004. Xabier Fernandez (Ibarra), belan (urrezko domina).
Pekin 2008. Leire Olaberria (Ikaztegieta), txirrindularitzan (brontzezko domina); Fernandez, belan (zilarrezko domina).
Londres 2012. Olaberria, txirrindularitzan; Fernandez, belan.