Tolosa eta Donostia arteko autobus zerbitzuan murrizketak bertan behera utziko dituzte

Tolosatik Donostiara herriz herri autobus zerbitzuaren (BU07 linea) maiztasuna, berriro ere, ordu erdirokoa izango da irailetik aurrera.

Uztailaren 1ean sartu zen indarrean Lurraldebusen ordutegi berria. Eta, besteak beste, Tolosatik Donostiara herriz herri doan zerbitzuaren maiztasuna 30 minutuero izatetik, 60 minutuero izatera murriztu da, Gipuzkoako Foru Aldundiak horrela erabakita. Zerbitzu honen erabiltzaileen kezka eta ezinegona ikusita, Amasa-Villabonako eta Irurako udalak Buruntzaldeko beste hainbat alkate eta udal ordezkarirekin batera joan den astean bildu ziren Gipuzkoako Foru Aldundiko Mugikortasun eta Lurralde Antolaketako arduradun politiko eta teknikoekin.

Udal ordezkariek Mugikortasun eta Lurralde Antolaketako diputatu Rafaela Romerori Lurraldebuseko erabiltzaileen "haserrea eta ezinegona" helarazi zioten. Era berean, eskaera argia jarri zuten mahai gainean: autobus zerbitzu horren maiztasuna ordu erdikoa izatea, uztailaren 1era arte zegoen moduan. Aldundiak eskaera ulertu, eta, irailetik aurrera, zerbitzuaren maiztasuna lehengora bueltatzeko konpromisoa hartu zuen udal ordezkarien aurrean.

Amasa-Villabonako Udalak esan du bilera horren emaitza "oso positiboa" izan dela eta Gipuzkoako Foru Aldundiak hartutako konpromisoa beteko duela espero du. "Autobus garraio publikoa bultzatu nahi bada, autobus zerbitzuen maiztasunetan murrizketak egiteak ez du inolako zentzurik", esan dute udal ordezkariek.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!