Tolosaldeak irabazi du Zumaiako IV. Ikurrina

Argazkia: Arnaitz Rubio Aprea

ETE ligako lider izaten jarraitzen du eskualdeko traineruak. Gaur nagusi izan dira hasieratik; ziabogan jada bost segundoko aldea ateratzen zien txandako gainerako traineruei.

Arraun jardunaldiak arratsaldean izan du jarraipena Zumaian. ETE ligako traineruak izan dira lehian; tartean, baita Zumaiako Telmo Deun eta Zarautz ere. Ohi bezala, hirugarren txandan erabaki da banderaren irabazlea. Estu hasi da txandako lehia, izan ere, lautik hiru traineruk, tartean Delteco Zumaiak, denbora bera egin dute lehen ziabogan: 05:18. Denbora hobea egin du Tolosaldeak, ordea, eta bigarren luzean ere aise menderatu du txanda. 10:51,41 denboran amaitu ditu lanak Tolosaldeak, eta hamaika puntuak poltsikoratuta, ETE ligako sailkapenean lider da gaur-gaurkoz.

Zumaiarrak seigarren sailkatu dira gaurko estropadan. 11:06,69an amaitu dituzte lanak, beren txandan laugarren. Zarautz-Gesalaga-Okelanen ontzia lehen txandan ureratu da, eta lehena izan da hiru ontzien artean lanak amaitzen, 11:20,50 denboran. Sailkapen orokorrean zazpigarren postua lortu du, eta aurkari zuzena den Lutxanak baino azkarrago burutu ditu bi luzeak Zarautzek. Ligako sailkapenean bederatzigarren dira zarauztarrak, baina gaur lortutako puntuei esker zortzigarren postuan den Lutxanagandik oso gertu kokatu dira. 

Atsedena izango dute ETE ligako arraunlariek datorren asteburuan. Bien bitartean, abuztuaren 1ean jokoan izango duten Emakumeen Traineru Elkartea III. Banderarako prestatzen jarraitu beharko dute. 

Zumaiako IV. Ikurrina:

  1. Tolosaldea: 10:51,41
  2. Hibaika: 10:57,37
  3. Deusto: 10:58,05
  4. San Juan: 11:00,73
  5. Ondarroa: 11:04,59
  6. Zumaia: 11:06,69
  7. Zarautz: 11:20,50
  8. Lutxana: 11:30,20
  9. Lapurdi: 11:41,89
  10. Castro: 11:44,80

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!