Uda hasi berritan birusak izan duen bilakaera okerraren datuak mahai gainean dituela bildu da Labiren Aholku Batzordea gaur goizean, lehendakaritzako egoitzan. Iñigo Urkullu Eusko Jaurlaritzako lehendakaria buru dela egin dute bilera, eta Bizi Berri IV plana izan dute aztergai. Bilera amaituta, Urkulluk jakinarazi du indarrean dauden neurriei eutsiko dietela, eta beraz, ez dituztela gogortuko. Planean jasotzen diren hiru agertokietan, tentsiorik handiena dutenetan daude Araba, Bizkai eta Gipuzkoa, baina bestelako aldagai batzuk kontuan hartu dituzte neurriak ez gogortzeko, hala nola, txertaketaren datuak eta ZIUetako egoera. ZIUetako egoerari dagokionez, une honetan lehen agertokian dago Euskal Autonomia Erkidegoa, eta beraz, Bizi Berri IV Planaren arabera, ez da behar neurriak gogortzea.
Hala, lehendakariak iragarri duenez, erabaki da ekaina amaieratik indarrean dauden neurriak ez gogortzea. Hori hala, establezimenduek goizaldeko 02:00etan itxi ahalko dute, eta ostalaritzan mahai bakoitzean sei pertsona eseri ahalko dira, orain arte bezala. Txokoek eta elkarte gastronomikoek irekita jarraituko dute, eta publikoa egon ahalko da kirol ikuskizunetan, baina edukiera mugatuta. Neurri horiekin batera, lehendakariak azpimarratu du dekretu batean jasoko dutela kaleko edana, eta jende pilaketak sortzen dituzten kaleko festak eta ez festak debekatuta egongo direla. Bihar sartuko dira indarrean neurriok.
Jarraitu Berria.eus-en.