IV. Donibane Lohizuneko Estropada zegoen gaur jokoan, eta beste behin Tolosaldea trainerua gailendu da. Iaz hamabi banderetatik bederatzi lortu bazituzten, aurtengoan lau estropadetatik hiru irabazi dituzte oraingoz. Gainera, gaurkoan dezenteko abantaila lortu dute TAK klubeko arraunlariek. Tolosaldeak 10.55,40ko denbora egin du, eta bigarren izan den Hibaikari ia bederatzi segundoko abantaila atera dio. Zumaia izan da hirugarren, hamabi segundora eta laugarren Deusto helmugaratu da, 19 segundora.
Laugarren jardunaldiaren ondoren Tolosaldeak ligako lehen postua sendotu du. 43 puntu ditu eskualdeko traineruak, eta bigarren doan Deustok orain 39 puntu ditu. Hirugarren doa Hibaika 36 punturekin, eta Zumaia laugarren, 30 punturekin.
Bihar goizean izango dute ETE Ligako bosgarren estropada, III. Sestaoko Udalaren Bandera, Portugaleten jokatuko dena.
