Lurgatz talde feministaren ekimenez, LGTBI kolektiboaren harrotasun egunean, Olaederra kiroldegi ondoko hesia margotu dute. Ekimenarekin bat egin du Akain Aiztondoko neska gazteen taldeak eta hesiaren margotzea babestu du Amasa-Villabonako Udalak.
“Oso esanguratsua izan da betidanik mugimendu feministarentzat egun hau, markatuta dago gure agendan. Ekimenarekin ikusarazi nahi dugu kolore anitzeko pertsonak gaudela herrian“, esan dute Lurgatz eta Akain taldeetako kideek.
Anoetan ere aniztasunaren alde
Anoetako plazan Herria koloreztatu ekimena egin dute arratsaldean. Anoetako Emakumeek eta Matraka talde feministak Anoetako Udalarekin batera antolatu margotze ekitaldia. Plazan, udaletxeko aldamenean dauden eskailerak ortzadarraren kolorez margotu dituzte auzolanean.