Eskuzko modalitatean, binaka nagusien mailan, Euskal Liga jokatu da bi taldeetan banatuta eta talde bakoitzeko lehenak eskualdekoak izan dira. A Taldean Tolosa eta B Taldean Intxurre nagusitu dira. Finalerdiak etxean jokatuko dituzte, beste taldeko bigarrenaren aurka.
Alegiako klubari dagokion finalerdia Elorri pilotalekuan izango da, gaur, 19:30ean. Mundarro izango dute aurkari, eta ikusleak sartu ahalko dira frontoian. Intxurreko bikotea Julen Alberdi zizurkildarrak eta Aratz Irazustabarrena alegiarrak osatu dute eta jokatutako partida guztiak irabazi dituzte Ligan. Beste finalerdia igandean, 11:00etan, Amezketan izango da Tolosa eta Lemoaren artean.