Tolosaldea Garatzenek eta Elhuyarrek sustaturiko Bizilabe Tolosaldea 2020-2021 ikasturtea amaierara iritsi da. Hori dela eta ekitaldia egin dute Tolosaldea Lanbide Heziketa Institutuan. Bizilabeko 10-14 urte bitarteko gazteek urtean zehar egindako zientzia eta teknologia esperimentu eta proiektuak aurkeztu dituzte guraso, lagun eta agintarien aurrean.
Tolosaldea Garatzeneko Garbiñe Mendizabal Ormazabalek eta Elhuyarreko Leire Ferro Leturiak eman diete ongietorria bertaratuei. Segidan, Saioa Aramburu Echezarretak, Bizilabeko gidariak, urtean zehar egindakoa azaldu die. Ondoren, gazteek, taldeka aurkeztu dituzte proiektu eta esperimentuak: ihes-gela, mikroskopioa, koloretako planetak, 3D betaurrekoak, arduino plakez irekitzen diren kutxak, itsasontziak, etab. Estatuko zein nazioarteko ikerketek erakusten dute, halako bizipenek garrantzia handia dutela, hainbat zeharkako konpetentzia lantzearekin batera, zientzia eta teknologiarako bokazioa pizten laguntzen baitute.
Senideek ez ezik, Olatz Peonek, Tolosako alkateak, Amagoia Agirrek, Amasa-Villabonako Hezkuntza zinegotziak, eta Iñaki Pakeak, Tolosaldea Institutuko zuzendariak ere arretaz entzun dituzte gazteen azalpenak.
Ekitaldiari amaiera emateko, Tolosaldea Lanbide Heziketa Institutuan kokatzen den Domotek enpresan bisita gidatua jaso dute bertaratuek. Koldo Artolaren azalpenen bidez, martxan dituzten hainbat proiektu ezagutu dituzte eta bertako langileekin gertuko harremana izan dute. Bizilaberen helburuekin bat dator, izan ere, zientzia- eta teknologia-bokazioak pizteko, garrantzitsua da eskualdeko jarduna eta bertako langileak ezagutzea.
Bizilabeko arduradunek gogoratu dute jada zabalik dagoela datorren ikasturterako izen ematea.