Tolosaldea Garatzenek Elhuyarrekin batera sustatutako Bizilabe Tolosaldea aisialdi eskaintzaren datorren ikasturteko edizioan izena emateko epea ireki da. Bigarren urtez, herriko gazteen artean zientziarekiko eta teknologiarekiko interesa eta motibazioa, ekintzailetasuna eta sormena bultzatuko dira.
2021eko urritik aurrera 10 eta 14 urte bitarteko gazteek tailerretan parte hartu eta proiektuak egin ahal izango dituzte Amasa-Villabonan eta Tolosan, hurrez hurren, Gaztegunean eta Tolosaldeko Lanbide Heziketa Institutuan izango dira saioak. Ikasturtean zehar, alor desberdinetako zientzia eta teknologia esperimentuak egingo dituzte eta ltalde lanean proiektuak garatuko dituzte, ikertzaile profesionalen gidaritzarekin.
Bizilabe Tolosaldea egitasmoan, tokian tokiko ikastetxe, herriko eragile, ikerketa zentro edota enpresek dihardute lanean eta STEM (Zientzia, teknologia, ingeniaritza eta matematikak) delakoak bultzatzea dute helburu.
Bide horretan, Bizilabe Tolosaldeako gazteek eskualdeko ikerketa zentroak eta enpresak bisitatuko dituzte eta ikertzaileekin harremanetan izango dira. Horrez gain, hainbat zientzia jarduera antolatuko dira herriko eragileekin elkarlanean. Horren erakusle, ikasturte honetan arrakasta handiz ospatu den Nazioarteko Neska eta Emakume Zientzialarien Eguna, herrietan egin diren zientzia bizipenak edo eskualdeko irakasleekin egin diren trebakuntza saioak.
Izen emateak zabalik
Ikasturte berrian izena emateko lehenengo txanda ekainaren 8tik 20ra egongo da zabalik. Webgune bidez egingo da. Ekainaren 20tik aurrera, berriz, libre geratu diren plaza horietan izena emateko aukera zabalik utziko da.
Programa abenduaren bukaerara arte dago bermatuta momentuz, eta parte hartzaile kopuruaren arabera jarraituko du urtarriletik 2022ko ekainera bitartean.
- Amasa-Villabona: Astearteak
-
- LH 5-6: 17:15 – 18:45
- DBH 1-2: 18:45 – 20:15
- Tolosa: Ostegunak
-
- LH 5-6: 17:15 – 18:45
- DBH 1-2: 18:45 – 20:15
- Prezioa: Kuota arrunta, 10 euro hilean (hilero kobratuko da)
- Informazioa eta formularioa: https://labur.eus/lXVLz