Sindikatuek esan dute pasa den apirilaren 22an egindako grebaren balorazioa oso positiboa dela, baina Eusko Jaurlaritzak ez duela behar bezalako erantzunik eman. "Milaka langile publikori greba eskubidea ukatzen zieten gutxieneko zerbitzuak ezarri arren eta pertsonen mugikortasuna asko baldintzatzen zuen pandemia egonda ere, 18.000 langilek baino gehiagok parte hartu zuten EAEko hiru hiriburuetan deitutako manifestazioetan", gogoratu dute.
Eusko Jaurlaritzak ordea, 60.000 langile baino gehiago kontsolidatzeko benetako urratsik eman gabe jarraitzen duela esan dute, eta erantsi dute "Europako behin-behinekotasun ranking altuenaren lehen tokian dagoen bitartean, pribatizazioaren aldeko apustuarekin" jarraitzen duela. Horiek horrela Jaurlaritzak egiten duen proposamena ez dela nahikoa uste dute sindikatuek; "ez mahai orokorrean, ez mahai sektorialean, ez du enplegu publikoa kontsolidatzeko bidean aurrera egiteko borondaterik agertzen".
Sindikatuek esan dute bilera deialdiak egingo dizkiotela Eusko Jaurlaritzari, Eudeli eta alderdi politikoei, "haien esku dagoelako, eta ez beste batzuetan, zerbitzu publikoak indartzea eta behin-behinekotasunaren gaitza pairatzen duten 60.000 langile baino gehiagori enplegua kontsolidatzea". Bide horretan kokatu dute gaurko elkarretaratzea eta ekainaren 5ean Donostian, Bilbon eta Gasteizen manifestazioak egingo dituztela esan dute.
