Lurgatzek Zizurkilen izan den eraso matxista salatu du

Biktimari babesa eta laguntzeko prestutasuna adierazi diote talde feministatik.

Zizurkilgo Udalak ateratako idatziaren harira, Lurgatz talde feministak "argi eta ozen" salatu nahi izan du Zizurkilen jaso den indarkeria matxista. Honekin batera, babes osoa helarazi nahi izan dio biktimari eta edozeren aurrean laguntzeko prestutasuna adierazi diote emakumeari.

"Geuk babesa ematetik haratago, ezinbestekoa deritzogu jendarteak berak ere babestea; herritar ororen zeregina da biktimarekin bat egitea eta erasoen aurrean erantzun bat ematea. Noski, hor izango gara emakumeok lehen lerroan erasoen aurrean autodefentsa aldarrikatuz. Indarkeria matxista ez da egun bateko gertakaria eta zoritxarrez, emakumeok egunerokotasunean pairatzen ditugu erasoak" esan dute Lurgatz talde feministatik.

Ohar batean gaineratu duenez, "egunerokotasunean bizi dugun indarkeria sinbolikoa da erasotzailea, gizonezkoa, gertakari hauetara bideratzen duten muina. Eskuartean dituzten pribilegioek boterearen jabe direla sinestarazten die eta horri aurre egin behar diogu. Pribilegio horiek emakumeon eskubideen lepotik doaz eta ez dira inondik inora naturalak".

Azken eraso matxistaren harira Zizurkilen egon daitekeen mobilizazioarekin bat egingo duela jakinarazi du Lurgatzek. "Hortxe izango gaitu erasotzaileak gure eskubideak aldarrikatzen. Erasotzaileak ez ditugu onartuko ez Villabonan, ez Zizurkilen ezta beste inon ere. Gora autodefentsa feminista!"

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!