Aurreko urtean ez zen Herriarteko Txapelketarik egin, COVID-19aren inguruko neurriengatik, eta aurten berriro ere martxan jarri dute Gipuzkoako Euskal Pilota Federaziotik. Lau modalitatetan jokatuko da, eskuz, gomazko paletan, pala motzez eta larruzko paletan eta zesta puntan, baina parte hartzen duten eskualdeko herriek lehen bietan ariko dira.
Zozketa ere egin dute, Internet bidez, eta eskuz final-zortzirenekin hasiko dira kanporaketak: Andoain-Tolosa, Alegia-Zestoa, Aduna-Ataun, Bidania-Goiatz-Amezketa, Aretxabaleta-Hernani, Oñati-Azpeitia, Bergara-Astigarraga eta Oiartzun-Azkoitia. Joaneko neurketa maiatzaren 16an jokatuko da eta itzulerakoa maiatzaren 23an. Gomazko paletan final-zortzirenetan sartuko dira eskualdeko herriak, eta aurreko data berberetan jokatuko dira joaneko eta itzulerako neurketak. Hauek izango dira kanporaketak: Azpeitia-Tolosa, Amasa-Villabona-Anoeta, Errenteria-Azkoitia, Soraluze eta Zumarraga arteko irabazlea-Hernani, Aia-Astigarraga, Mutriku-Donostia, Zestoa eta Deba arteko irabazlea-Andoain eta Zarautz-Orio. Azkeneko txapelketan, 2019an, Tolosa txapeldunorde izan zen gomazko paletan.