Pello Lizarralde eta Joxean Agirre dira Akademiaren Sariko finalistak

Tolosaldeko Ataria 2021ko api. 13a, 17:00

Lizarralderen 'Argiantza' edo Agirreren 'Nobela errealista bat' liburuen artean hautatu beharko dute akademiakideek sariduna. Apirilaren 22a da botoa emateko azken eguna.

2020. urteko 111 Akademiaren Saria nori eman erabakitzeko 111 Akademiak hirugarren eta azken bozketa txanda martxan jarri berri du. Luis Garderen Aireportuko musika, Pello Lizarralderen Argiantza, Uxue Alberdiren Dendaostekoak, Idoia Garzesen Mendiko gaitza eta Joxean Agirreren Nobela errealista bat izan dira lehian bigarren txandan, lehenengo bueltan boto gehien jaso zuten bost obrak, alegia.

Bigarren bueltan saridun izendatzeko beharrezkoa den botoen %40a lortu duen lanik ez da izan eta, beraz, boto gehien jaso duten bi obrak aurtengo finalera pasatu dira: Pello Lizarralderen Argiantza eta Joxean Agirreren Nobela errealista bat. Bi horien artean hautatu beharko dute sariduna akademiakideek apirilaren 22ra bitartean.

Gauzak ondo bidean, akademiak apirilaren amaieran emango du ezagutzera 2020ko 111 Akademiaren Saria.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!