Ikaztegietatik sartuko dira txirrindulariak Tolosaldera, 14:45ak aldera, batez besteko azkarrenaren arabera. Ondoren, Alegiatik pasa ostean, Altzo Azpitik joango dira, Altzo Muinotik pasa gabe, Tolosa aldera joateko. Handik Anoetara joko dute, ondoren Alkizara igotzeko. Asteasu eta Zizurkil arteko errepidera jaitsi eta ondoren Zizurkil eta Adunatik pasako dira, Andoain aldera jarraitzeko.
Eskualdeko ibilbidetik puntu nabarmenena Alkizako mendatea da. Hirugarren maila eman dio antolakuntzak, eta baliteke ihesaldiren bat martxan izatea bertan. Eskualdera sartu aurretik, gainera, Deskargako mendatea pasako dute txirrindulariek, eta hor aukera on bat izan daiteke ihesaldia osatzeko.
Caja Rural-RGA taldeko Jon Irisarri leaburuarra parte hartzen ari da Itzulian, eta herenegungo etapan bere protagonismoa izan zuen, ihesaldi nagusian sartu ziren zazpi txirrindularietako bat izan baitzen. Aurreko astean TOLOSALDEKO ATARIA-k Irisarrirekin hitz egiteko aukera izan zuen, eta gaurko etapan eskualdetik pasatzerakoan ihes eginda joatea «polita» izango litzatekeela esan zuen. Ikusi beharko da, beraz, leaburuarrak aukerak dituen beste ihesaldi batean sartu eta eskualdeko zaleen animoak jasotzeko.